WK-geveul

De nationale elf goat veur de heugste eer
het hele eand noar Kaapstad um te ballen.
Gelukkig duurt de jetlag stief een Tweans kwarteer.
Midsommerhoorns roopt op um an te vallen.

Doar ligt wiej veer wek laank te toeten al wat ’t kan
de longen bloazend oet bezöppen lieven.
Het vak met vuvuzela’s geet het duuvels an.
In ‘n heksenkettel waart zich witte wieven.

Te deanken dat wiej eaven de finale haalt
onmeunig oonderschat hoe hoog de lat lig.
Zo-j zeen da-j heurt: dee spöllers kriegt tevöl betaald
as greuts Oranje het geliek an ’t gat krig.

En as de Duutsers wàl in de finale stoat
probeert wiej oons der ouwerhen te zetten.
Zo kan het helpen da-w nen dag noar Meunster goat.
Van ’n hearfs ‘n moal, eerst ’n luk tied um te vergetten.